Macarıstanın Budapeşt şəhərində yerləşən Azərbaycan Evində “Sərsəng Su anbarı: Humanitar fəlakətin bir addımlığında” mövuzunda foto-sərgi və tədbir keçirilmişdir.
Tədbiri giriş sözü ilə Macarıstan-Azərbaycan Evinin rəhbəri İbrahim Səfərli açaraq iştirakçıları salamlamış, tədbir barədə məlumat verdi. Daha sonra Azərbaycan Diasporuna Dəstək Fondunun icraçı direktorunun müavini, layihə rəhbəri Şahin Camalov layihə barədə məlumat vermiş, Sərsəng Su anbarının tikilməsi, region üçün əhəmiyyəti və son vəziyyəti ilə bağlı əhəmiyyətli məsələlərə toxunmuşdur. Şahin Camalov həmçinin Ermənistanın və havadarlarının bütün beynəlxalq hüquq norma və prinsiplərinə, həmçinin insani dəyərlərə məhəl qoymayaraq sudan təzyiq və təsir vasitəsi kimi istifadə etməyə davam etməsindən, region əhalisini sudan məhrum edərək həm regionun iqtisadi inkişafına, həm də ekologiyasına vurduğu zərərdən danışmışdır. Tədbirdə həmçinin Sərsəng su anbarının son durumuna dair iştirakçılara məlumat verilmiş, Anbarda baş verə biləcək hər-hansı qəzanın humanitar fəlakətə dönüşə biləcəyindən danışılmışdır. O da qeyd olunmuşdur ki, Sərsəng Su anbarının işğalda saxlanması regionun 100 min hektardan çox kənd təsərrüfatı təyinatlı torpaqlarına, 700 mindən artıq insanın gündəlik həyatına və onların gündəlik yaşam keyfiyyətinə mənfi təsir etməkdədir.
Tədbir iştirakçıları sonda BMT-nin ixtisaslaşmış təşkilatlarını, Avropa Şurası Parlament Assambleyasını, Avropa İttifaqını, Human Rights Vatch təşkilatını Sərsəsng ətrafında baş verən hadisələrə münasibət bildirməyə, Avropa Şurası Parlament Assambleyasının “Azərbaycanın cəbhəboyu rayonlarının sakinləri qəsdən sudan məhrum edilir” adlı 2085 (2016) nömrəli Qətnaməsini əldə rəhbər tutaraq Ermənistana və havadarlarına təzyiq etmək və onların ekoloji terrora son qoymaları üçün çağırış etməyə dəvət etmiş, bununla bağlı Bəyanat imzalamışlar.
Tədbirdə Türkiyə, Qazaxıstan, Tatarıstan, Azərbaycan diasporunun nümayəndələri ilə yanaşı yerli icma nümayəndələri də iştirak etmişdir. Tədbirdə həmçinin Azərbaycan diasporunun nümayəndəsi Kamil Şükürovun ifasında milli musiqilər ifa olunmuşdur.
Tədbir Azərbaycan Diasporuna Dəstək Fondu və Macarıstandakı Azərbaycan Evinin təşkilati dəstəyi, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə İnsan Hüquqları XXI əsr-Azərbaycan Fondu tərəfindən həyata keçirilmişdir.
