"OpenAI" şirkəti yaxın zamanda "ChatGPT"yə valideyn nəzarəti funksiyasının əlavə olunacağını açıqlayıb.
Intihar nəticəsində ölən bir yeniyetmənin valideynləri tərəfindən məhkəmə iddiası ilə bağlı açıqlama verən şirkət "ChatGPT"nin gənc istifadəçiləri üçün yeni təhlükəsizlik tədbirləri təqdim edəcək.
Yeni qaydalara görə, servisdə qeydiyyatdan keçmək üçün minimum yaş həddi 13 olacaq.
Valideynlər öz hesablarını övladlarının hesabına bağlaya biləcəklər. Bu onlara çatbotun uşağa necə cavab verdiyini izləməyə, bəzi funksiyaları idarə etməyə imkan verəcək. Həmçinin süni intellket uşağın “kəskin stress anı” yaşadığını aşkar etdiyi təqdirdə valideynləri xəbərdar edə biləcək.
Yeni nəzarət sisteminin hazırlanmasında 60 ölkədən 250-dən çox psixi sağlamlıq və gənclərin inkişafı üzrə mütəxəssisin iştirak etdiyi vurğulanıb.
Xatırladaq ki, ABŞ-ın Kaliforniya ştatından olan valideyn oğlunun ölümündən sonra “OpenAI” şirkətinə qarşı məhkəmə iddiası qaldırıb.
