Böyük Britaniyanın baş naziri Key Starmer və Fransa prezidenti Emmanuel Makronun aylarla davam edən sakit diplomatik səylərindən sonra ABŞ prezidenti Donald Tramp Vladimir Putinlə bağlı ritorikasını bir qədər dəyişib.
“Politico”-nun avropalı siyasətçilər arasında olan mənbələrə istinadən verdiyi məlumata görə, həm Starmer, həm də Makron Trampı Ukrayna prezidenti Vladimir Zelenskiyə təzyiq etməməyə və qəzəbinin bir hissəsini Putinə yönəltməyə çağırıb. Bunun üçün Putinin ABŞ prezidentini “axmaq” kimi göstərməsi arqumentindən istifadə ediblər.
Nəşr yazır ki, London və Paris diplomatlarının son üç ayda göstərdikləri səylər öz bəhrəsini verməyə başlayıb. Həmçinin Trampın komandası ilə danışıqlarda Böyük Britaniyanın milli təhlükəsizlik müşaviri Conatan Pauell və müdafiə naziri Con Hilinin əsas rol oynadığı açıqlanıb. Onların səyləri ABŞ-ın Böyük Britaniyadakı səfiri Mark Burnett ilə əlaqələndirilib.
Böyük Britaniyanın xarici işlər naziri David Lemmi etiraf edib ki, o, təkcə bu il ABŞ dövlət katibi Marko Rubio ilə 13 söhbət edib, Starmer və Tramp arasında “demək olar ki, eyni sayda” söhbət olub.
Keçmiş Britaniya səfirlərindən biri deyib: “Zelenski açıq şəkildə Trampın Romadakı düşüncəsinə təsir edib”. O qeyd edib ki, Britaniya və Fransa ardıcıl olaraq Putinin “özünün elan etdiyi atəşkəsi davamlı olaraq pozmaqla Trampa hörmətsizlik etdiyini” vurğulayıb. Diplomat bunun xüsusilə həssas məsələyə çevrildiyini irəli sürüb, çünki Tramp "insan itkilərinə həssasdır - bu, onu həqiqətən narahat edir".
"İndi Tramp başa düşdü ki, Putinə etibar etmək olmaz. Makron bunu daim təkrarlayır və Trampa çatdırmağa çalışır. Bu, bizim hazırkı strategiyamızdır", - Fransa rəsmisi ətraflı məlumat verib.
Bununla belə, “Politico”-nun qeyd etdiyi kimi, Britaniya və Fransa indi səbirsizliklə Trampın Putinə qarşı sərt mövqeyinin nə qədər davam edəcəyini gözləyirlər.[i][/i]
