Məşhur irlandiyalı idmançı Konor Makqreqor bazar ertəsi günü ABŞ-ın Florida ştatında polis tərəfindən saxlanılıb.
ONA-nın “TASS” agentliyinə istinadən vediyi xəbərə görə, bu barədə “Miami Herald” qəzeti məlumat yayıb.
Bildirilir ki, idmançı bir fanatının mobil telefonunu sındırıb və özü ilə aparıb. Buna görə də ona qarşı soyğunçuluq və özgənin əmlakına ziyan vurma maddələri ilə ittiham irəli sürülüb.
Nəşrin məlumatına görə, Makqreqor Mayami-Biçdə oteldən çıxıb gecə klubuna gedən zaman qarşılaşdığı fanatı onunla şəkil çəkdirmək istəyib. Bundan qəzəblənən idmançı telefonu həmin şəxsin əlindən alaraq sındırıb, daha sonra isə özü ilə aparıb.
Polisin bildirdiyinə görə, zərərçəkmişə hadisə nəticəsində 1000 dollar ziyan dəyib. K.Makqreqor hadisə yerində saxlanılmayıb. Polis onu evində həbs edib. Hazırda onun Mayami-Deyd həbsxanasında olduğu deyilir.
