Təhsil sektorları arasında intellektual çempionat keçirilib
- - - - -
Dekabrın 8-də Yevlax şəhər S.Vurğun adına 2 nömrəli tam orta məktəbdə Mərkəzi Aran Regional Təhsil İdarəsinin təşkilatçılığı ilə strukturuna daxil olan sektorların təhsil işçiləri arasında intellektual çempionat keçirilib.
Tədbirdə Mərkəzi Aran Regional Təhsil İdarəsinin müdir müavini Cavad Cavadov və çempionatda mübarizə aparan komandalar iştirak edib.
Yarışı giriş nitqi ilə açan müdir müavini Cavad Cavadov təhsil işçilərinin asudə vaxtlarının səmərəli təşkil edilməsində və onların intellektual fəaliyyətinin inkişaf etdirilməsində belə müsabiqə və yarışların xüsusi rola malik olduğunu bildirib və iştirak edən bütün komandalara uğurlar arzu edib.
Təhsil işçiləri arasında təşkil olunan çempionatda 6 nəfərdən ibarət olmaqla, 10 komanda mübarizə aparıb.
Maraqlı mübarizə şəraitində keçən çempionatda Mingəçevir şəhəri üzrə təhsil sektorunun "Everest" komandası I yer, İnzibati təşkilat sektorunun "İmperiya" komandası II yer və Kürdəmir rayonu üzrə təhsil sektorunun "Zəfər" komandası III yer qazanıb.