Azərbayan Qızıl Aypara Cəmiyyətinin nümayəndələri Türkiyə Qızıl Ay Cəmiyyətinin, Beynəlxalq Qızıl Xaç və Qızıl Aypara Cəmiyyətləri Federasiyasının və Beynəlxalq Qızıl Xaç Komitəsinin rəhbər və məsul şəxsləri ilə birlikdə münaqişədən zərərçəkmiş mülki əhaliyə baş çəkmək üçün cəbhəyanı ərazilərə səfər edib. Öncə Yevlax rayonunda olan heyət, Türkiyə Qızıl Ay Cəmiyyətinin zərərçəkmiş mülki əhaliyə göndərdiyi humanitar yüklərin saxlanılma yeri və humanitar yardım qutularındakı çeşidlərlə tanış olublar. Humanitar yüklərin daşınması və paylanılması qaydası haqqında ətraflı məlumat alıblar.
Daha sonra heyət Gəncə şəhərində müharibədən zərərçəkən insanlara zəruri ləvazimatların paylanması prosesində iştirak ediblər. Zərərçəkmiş insanların ehtiyacları müəyyənləşdirilib və zəruri məişət avadanlıqlarının alınması üçün qiymətləndirmə işləri aparılıb.
Bərdə rayonunda BQXK-nın ofisində Hərəkat daxili 3 tərəfli görüş keçirən heyət atılacaq növbəti addımlar haqqında müzakirələr aparıb. Görüşdə müvafiq qərarlar qəbul edilib.
Səfər zamanı Tərtər rayon bölməsinin ofisində keçirilən görüşdə mövcud vəziyyət haqqında məlumat verən Tərtər rayon bölməsinin sədri məlum hadisələr zamanı üzləşdikləri çətinliklər və gördükləri işlər haqqında ətraflı məlumat verib. Sığınacaqda olan zərərçəkmiş 300 nəfər mülki əhaliyə dayanmadan gündəlik olaraq humanitar yardım göstərildiyini xüsusi olaraq qeyd edib. Bu işlərdə AzQAC-ın könüllülərinin də rolunu çox yüksək qiymətləndirilib.
Sonra Tərtər rayonu ərazisində qarşı tərəfin hücumu zamanı dağıdılmış evlərə baş çəkilib, ev sahiblərinin problemləri və ehtiyacları müəyyənləşdirilib və lazımi tədbirlər üçün qeydlər aparılıb.