İspaniyanın paytaxt derbisində qonşusu “Atletiko”ya 2:1 hesabı ilə məğlub olan “Real Madrid”də gərginlik getdikcə artır.
“Mundo Deportivo” qəzetinin məlumatına görə, “Real Madrid”in kommunikasiya departamenti milli komandaların oyunları ilə bağlı fasilə zamanı səssizliyini qoruyaraq komandanın üzləşdiyi idman problemlərini həll etməyə çalışmaq əvəzinə, “düşmən” hesab etdiyi media qurumlarına qarşı açıq müharibəyə başlayıb.
Bu çərçivədə klub “El Partidazo” proqramının prodüseri və jurnalist Xuanma Kastanonu “COPE” radiosu vasitəsilə hədəfə alıb. “Real Madrid” ötən çərşənbə axşamı qəzetdə dərc olunan məqaləsində klubun telekanalı ilə “qonşu” bir qurum arasında müqayisə aparmasına görə Kastanyoya rəsmi etirazını bildirib. Kastanyo daha sonra bu müqayisəyə görə açıq şəkildə üzr istəyib.
Daha sonra klub ötən cümə axşamı onu yenidən hədəfə alıb. Bu dəfə isə “X” və “Instagram”da ümumilikdə təxminən 230 milyon izləyicisi olan sosial media hesabları vasitəsilə jurnalistlə bağlı son illərdə baş vermiş bir sıra mübahisələri və mübahisəli məsələləri əks etdirən video yayımlayıb.
Jurnalist Xuanma Kastanyo müqayisəyə görə üzr istəsə də, “Real Madrid”in telekanalı ilə bağlı mövqeyindən geri çəkilməyib. O, kanalın iş prinsiplərini dəyişənədək öz fikrində israr edəcəyini vurğulayıb.
Bu yanaşma yeni olmasa da, Florentino Peresin prezidentliyi dövründə uzun müddətdir davam edirdi. Lakin bu dəfə vəziyyət dəyişib. Əvvəllər qapalı şəkildə həyata keçirilən bu siyasətin sərhədləri aşılaraq proses tamamilə açıq xarakter alıb və ictimaiyyətə təqdim edilib.
Klubun “X” platformasında 49,5 milyon izləyicisi olan rəsmi hesabında “Real Madrid”in telekanalına məxsus və Kastanyo ilə bağlı bütün mübahisəli məsələləri əks etdirən material paylaşılıb.
“Real Madrid” daxilində media qurumlarının yaydığı məlumat və fikirlərdən ciddi narazılığın olduğu açıq şəkildə ortaya çıxıb. Bu səbəbdən klub hücuma keçmək qərarına gəlib və beləliklə, klub haqqında xəbərləri işıqlandıran və həmin xəbərləri şərh edən şəxslər diqqət mərkəzinə düşüb.
