Ukrayna hərbi qüvvələri Rusiyanın quruda irəliləməsini dayandıra və Rusiya donanmasını Qara dənizdən çıxara bilib və indi səmada "həlledici döyüş" başlayıb.
Bunu Ukrayna Prezidenti Volodimir Zelenski bildirib.
O, Ukraynanın havada döyüş qabiliyyətini nümayiş etdirdiyini və belə bir "səmavi" qarşıdurmada "ərazisi daha böyük olan" tərəfin əhəmiyyət daşımadığını iddia edib.
"İnanıram ki, bu müharibədə qələbə daha ağıllı tərəfə məxsusdur", - deyə Zelenski bazar ertəsi “Financial Times” qəzetinə verdiyi müsahibədə bildirib.
Prezident vurğulayıb ki, müharibənin nəticəsini "səma" müəyyən edəcək. Həmin gün Rusiya Silahlı Qüvvələrinin daha bir şiddətli hücumuna məruz qalan Kiyevin mərkəzindəki ofisində müxbirlə danışan Zelenski Rusiya paytaxtına zərbələri daha da gücləndirməklə hədələyib.
"Moskvaya yüz deyil, min dron uçanda... o (Vladimir Putin) başa düşəcək.
Bunu şəxsən hiss etməyə başlayan kimi, öz gözləri ilə görməyə başlayan kimi, müşavirlərinin onu Ural dağlarının o tayına köçməyə təşviq etdiyini görəcəksiniz", - deyə Ukrayna prezidenti bildirib.
O, əvvəllər Ukraynaya hücum davam edərsə, Moskvanı "yandıracağını" vəd etmişdi. Zelenski əlavə edib ki, onun fikrincə, müharibənin sonu "Putin Moskvadan nə qədər uzaqlaşsa", daha yaxın olacaq.
Onun sözlərinə görə, Ukraynanın Moskva və Sankt-Peterburqa genişmiqyaslı pilotsuz təyyarə hücumlarının psixoloji təsiri, eləcə də artan iqtisadi nəticələr sayəsində Putinin hesablamalarını dəyişdirəcək.
