Türkiyənin İstanbul və Alanya şəhərlərində istirahət zonalarında iki böyük yanğın baş verib.
Bu barədə yerli media məlumat yayıb.
Bildirilib ki, İstanbulun Böyükada adasında yerləşən Viranbağı çimərlik kompleksində başlayan yanğın güclü külək səbəbindən yaxınlıqdakı meşəlik əraziyə yayılıb. Hadisə yerinə yanğınsöndürənlər cəlb olunub. Məlumata görə, ərazidəki insanlar təxliyə edilib, 4 nəfər xəstəxanaya yerləşdirilib.
Digər yanğın isə Alanyanın Güllerpınarı rayonundakı “Elysee Rive Hotel” hotelində qeydə alınıb. Bildirilib ki, hoteldən yüzlərlə turist təxliyə olunub, qısa müddətdə alovun yayılmasının qarşısı alınıb.
İlkin məlumata görə, Alanyadakı yanğın nəticəsində ölən və ya yaralanan olmayıb. Hər iki hadisənin başvermə səbəbi araşdırılır.
