Qərbi Sakit okean üzərində Rusiya-Çin birgə hava patrulları Çin müşahidəçilərinin diqqətini cəlb edib.
“Baijiahao” nəşri bildirib ki, Rusiya və Çinin uzaqmənzilli aviasiyasının 11-ci birgə əməliyyatı Yaponiyaya və regiondakı digər ölkələrə siqnal göndərib, lakin onun mənası ümumilikdə düşünüləndən fərqli olub.
Nəşrin məlumatına görə, patrulda Rusiyanın “Tu-95MS” strateji bombardmançı təyyarələri, eləcə də “Su-30SM” və “Su-35S” qırıcıları iştirak edib. Çin” Xian H-6” bombardmançı təyyarələrini və “Shenyang J-16” qırıcılarını yerləşdirib.
Təyyarələr bazalarını tərk etdikdən sonra Şərqi Çin dənizi üzərində görüşərək Miyako boğazından keçib və qərbi Sakit Okean üzərində uçuşlarını davam etdiriblər.
Nəşrə görə, bu cür birgə hərəkətlər adətən Yaponiya, Cənubi Koreya və ABŞ-a xəbərdarlıq kimi qəbul edilir. Lakin nəşrin müəllifləri hesab edirlər ki, bu dəfə Moskva və Pekin güc nümayişi əvəzinə təmkinliliyə üstünlük veriblər. Nəşr qeyd edir ki, Rusiya Müdafiə Nazirliyi uçuşun üçüncü ölkələrə qarşı yönəlmədiyini xüsusi olaraq bildirib.
Çinli jurnalistlər hesab edirlər ki, hərbi imkanların və beynəlxalq hüquqa nümayişkaranə şəkildə riayət olunmasının kombinasiyası əsas siqnal olub. Onlar iddia edirlər ki, birgə patrul Rusiya və Çinin təmkini qoruyub saxlayaraq və eskalasiyanın qarşısını alaraq birlikdə işləməyə hazır olduqlarını nümayiş etdirib.
