ABŞ-ın Hörmüz boğazında qalan gəmilərə kömək etmək niyyətində olduğu "Azadlıq layihəsi" əməliyyatı bu mərhələdə gəmilərin Birləşmiş Ştatların Hərbi Dəniz Qüvvələrinin gəmiləri tərəfindən müşayiət olunmasını nəzərdə tutmur.
Bu barədə "The Wall Street Journal" qəzeti Vaşinqton administrasiyasının adı açıqlanmayan yüksək rütbəli nümayəndəsinə istinadəla məlumat yayıb.
Nəşrin məlumatına görə, əməliyyat dövlətlərin, sığorta şirkətlərinin və yük daşımaları ilə məşğul olan təşkilatların gəmilərin keçidini əlaqələndirə biləcəyi bir prosesdən ibarət olacaq.
Bundan qısa müddət əvvəl Tramp elan etmişdi ki, mayın 4-ü, bazar ertəsi səhər saatlarında Birləşmiş Ştatlar hərbi münaqişə səbəbindən orada blokadada qalan gəmilərin Hörmüz boğazından çıxarılmasını nəzərdə tutan "Azadlıq layihəsi" əməliyyatına başlayacaq. Amerika lideri bunu ABŞ, Yaxın Şərq ölkələri və xüsusilə də İran tərəfindən humanitar jest adlandırıb. Onun sözlərinə görə, həmin gəmilərin çoxunda ərzaq ehtiyatları və çoxsaylı heyət üzvlərinin sağlamlıq və sanitariya baxımından əlverişli şəraitdə göyərtədə qala bilməsi üçün zəruri olan digər vasitələr tükənir.
Həmçinin Ağ Ev rəhbəri xəbərdarlıq edib ki, əgər bu humanitar prosesə hər hansı şəkildə maneçilik törədilərsə, Amerika tərəfi müdaxiləyə güclə cavab verəcək.
