Kosmik tədqiqatların tarixi haqqında videolar hazırlayan bloger Tim Dodd (Everyday Astronaut), "Apollo-11" missiyasının orijinal çəkilişlərinin taleyi ilə bağlı maraqlı faktları açıqlayıb.
Bu məsələ uzun illərdir konspiroloqlar (sui-qəsd nəzəriyyəçiləri) tərəfindən NASA-nın nəyisə gizlətdiyi və ya Ayda heç vaxt olmadığı iddiası üçün istifadə edilirdi.
Tim Doddun araşdırmasına görə, hadisələrin əsl səbəbi daha çox texniki və bürokratikdir:
İkiqat yayım sistemi:
Ay missiyası zamanı siqnal iki yerə bölünürdü. Birinci axın birbaşa canlı yayım üçün televiziyalara ötürülürdü, ikinci axın isə 30 sm enində olan xüsusi maqnit lentlərə yüksək keyfiyyətlə yazılırdı.
Lent qıtlığı və səhv:
1970-ci və 80-ci illərdə NASA ciddi maqnit lenti çatışmazlığı ilə üzləşmişdi. Arxivdəki yüz minlərlə kaset, xərclərə qənaət məqsədilə yenidən istifadə üçün silinib. Təəssüf ki, bu kütləvi təmizlik zamanı "Apollo-11" missiyasının orijinal, yüksək keyfiyyətli qeydləri olan kasetlər də səhvən silinərək üzərinə yeni məlumatlar yazılıb. Bu vəziyyət NASA-nın orijinal qeydləri bir səbəbdən məhv etdiyinə dair sui-qəsd nəzəriyyələrinə səbəb olub. Məhz bu səbəbdən konspiroloqlar NASA-nın qeyri-adi kəşfləri və ya Aya enişin heç vaxt baş verməməsi faktını ört-basdır etdiyinə inanırlar.
