Tibb mütəxəssisləri əl barmaqlarının formasının dəyişməsinin ağciyər xərçənginin əlaməti ola biləcəyini bəyan ediblər.
Bu barədə Britaniyanın "The Mirror" qəzeti Roy Kasl Ağciyər Xərçəngi ilə Mübarizə Fonduna istinadla məlumat yayıb.
Mütəxəssislərin sözlərinə görə, ağciyər xərçəngini erkən mərhələdə müəyyən etməyə kömək edən və potensial olaraq həyat qurtara biləcək sadə bir test mövcuddur.
Bu test sağ və sol əlin barmaq dırnaqlarını uc-uca bir-biri ilə tutuşduraraq onları bir-birinə sıxmaqdan ibarətdir.
Normal halda barmaqlar arasında romb şəklində kiçik bir boşluq yaranmalıdır. Əgər bu boşluq yoxdursa, bu, barmaqların son falanqalarının qalınlaşmasından xəbər verə bilər. Belə simptom qeyri-kiçik hüceyrəli ağciyər xərçəngi olan xəstələrin 35%-də, kiçik hüceyrəli ağciyər xərçəngi olanların isə 4%-də müşahidə olunur.
Məqalədə vurğulanır ki, bu testin müsbət nəticəsi mütləq bədxassəli şişin olması demək deyil, lakin mütəxəssislər barmaqların formasında dəyişiklik yarandıqda həkimə müraciət etməyi tövsiyə edirlər.
