Abşeron-Xızı Regional Təhsil İdarəsinin müdiri İlhamə Abdullayeva Xızı rayonunda vətəndaşları qəbul edib.
Qəbul zamanı vətəndaşların təhsil sahəsi ilə bağlı müraciətləri dinlənilib. Müraciətlər əsasən təhsil müəssisələrinin təmiri, işlə təmin olunma, əmək müqaviləsinin uzadılması, dərs yükü və digər məsələlərlə bağlı olub. Qaldırılan məsələlər ətraflı araşdırılıb.
Vətəndaşların müraciət, şikayət və təklifləri qeydiyyata alınıb. Müraciətlərin bir qismi yerindəcə həllini tapıb, əlavə araşdırma tələb edən məsələlərlə bağlı isə müvafiq tapşırıqlar verilib.
Qeyd edək ki, səyyar qəbulların keçirilməsində əsas məqsəd yerlərdə vətəndaşları maraqlandıran məsələlərə operativ reaksiya vermək, vətəndaş məmnunluğunu təmin etmək, təhsil keyfiyyətini artırmaq, eləcə də təhsil müəssisələrində sağlam və şəffaf mühit formalaşdırmaqdır. Bu cür qəbullar mütəmadi olaraq davam etdiriləcəkdir.
