“Tavuş və Naxçıvan istiqamətində anklavların (Qazaxın üç anklav kəndi və Kərki kəndi) qaytarılmasının aktuallaşması həm hərbi, həm siyasi, həm də iqtisadi risklər yaradacaq”.
Bu barədə erməni ekspert Şiraz Xaçatryan deyib.
Xaçatryan hesab edir ki, anklavların qaytarılması sərhəddə hərbi baxımdan qüvvələr balansını poza, Ermənistan ərazisinə yeni “təzyiq nöqtələri” yarada bilər: “Siyasi baxımdan, bu, Ermənistanın maraqları nəzərə alınmadan güzəşt etmək deməkdir. İqtisadi baxımdan isə təkcə ərazilərin qaytarılması yox, həm də kommunikasiyaların itirilməsi olacaq. Çünki Ermənistanın daxili nəqliyyat əlaqələrinin mühüm hissələri bu zonalardan keçir”.
Erməni ekspert baş nazir Nikol Paşinyanın anklavlarla bağlı çıxışında “Artsvaşen”in (Gədəbəyin Başkəndi) Ermənistana verilməsi haqda dediklərinin reallıqdan uzaq olduğunu qeyd edib.
Xaçatryan bildirib ki, anklavların qaytarılmasının yaradacağı problemlər fonunda Naxçıvanla bağlı baş verənlər də Ermənistana risklər vəd edir.
“Azərbaycanda Naxçıvan rezidentlərinə vergi güzəştləri ilə bağlı qərar qəbul olundu. Bu, təkcə iqtisadi təşəbbüs deyil, həm də Naxçıvanın məskunlaşma və demoqrafik siyasəti ilə bağlıdır. Bilirik ki, Naxçıvan Azərbaycan və Türkiyənin iqtisadi əlaqələri üçün platforma rolunu oynayır. Vergi güzştləri bu bölgəni azad iqtisadi zonaya çevirir ki, bu da gələcəkdə əhali sayının artmasını şərtləndirəcək. Bütün bunlar Türkiyə və Azərbaycanın uzunmüddətli regional layihələrinin əsas dayaq nöqtəsi olacaq iqtisadi dəhlizin formalaşmasına töhfə verəcək. Belə vəziyyət Ermənistan üçün ciddi risklər yaradır.
Birincisi, bu, Türkiyə-Azərbaycan tanemdinin sərhədlərimizdəki təsirini artırır və Bakıya cənub-qərb sərhəd istiqamətində mövqelərini gücləndirmək imkanı verir, eyni zamanda, Ermənistanın İrana çıxışını faktiki olaraq “bağlayır”, cənub kommunikasiya imkanlarına nəzarəti zəiflədir.
İkincisi, Naxçıvanın “yeni modeli” sərhədin demarkasiyası çərçivsində Azərbaycanın qaytara biləcəyi ərazilərdə də oxşar azad iqtisadi zonaların yaradılması üçün presedent kimi istifadə oluna bilər, misal üçün anklavlarda. Bu o deməkdir ki, Ermənistanın sərhədləri yaxınlığında Azərbaycan və Türkiyənin nəzarəti altında yeni iqtisadi və logistika mərkəzləri yaradıla bilər”, - Xaçatryan vurğulayıb.
