Hindistanın paytaxtı Dehli yenidən dünyanın ən çirkli havası olan şəhəri elan olunub.
Bu barədə İsveçrənin "IQAir" təşkilatının açıqladığı son reytinqdən məlum olur.
Belə ki, oktyabrın 21-i şəhərdə havanın keyfiyyət indeksi (AQI) 350-yə çatıb, bu da "çox pis" çirklənmə səviyyəsi kimi təsnif edilir. Bu göstərici Ümumdünya Səhiyyə Təşkilatının (ÜST) tövsiyə etdiyi normadan 3,5 dəfə yüksəkdir.
Dehlidən başqa ilk "10-luğ"a Lahor, Karaçi (hər ikisi Pakistan), Mumbay (Hindistan), Pekin, Şanxay (hər ikisi Çin), Qvadalaxara (Meksika), Kəlküttə (Hindistan), Ravalpindi (Pakistan), Çennai (Hindistan) şəhərləri daxildir.
Bu şəhərlər sənaye tullantıları, avtomobil trafiki, kömür yandırılması və bayramlar zamanı fişənglərdən kütləvi istifadə səbəbindən güclü hava çirklənməsindən əziyyət çəkirlər.
Hindistanda vəziyyət "İşıqlar Festivalı" - Divalidən sonra xüsusilə kəskinləşir. Bu dövrdə fişənglərdən istifadə havadakı PM2.5 hissəciklərinin miqdarını əhəmiyyətli dərəcədə artırır ki, bu da şəhərlərdə havanın keyfiyyətini kəskin şəkildə pisləşdirir. Hindistanın Ali Məhkəməsinin müəyyən etdiyi məhdudiyyətlərə baxmayaraq, bir çox sakinlər qaydaları pozaraq pirotexnikadan istifadə etməyə davam edirlər.
Bütün bunlar əhalinin sağlamlığına ciddi ziyan vurur. Belə ki, sakinlər nəfəsalmada çətinlikdən, xroniki öskürək, göz qıcıqlanması və astmanın kəskinləşməsindən şikayətlənirlər. Bu baxımdan ən həssas kateqoriyaya uşaqlar, yaşlılar və xroniki xəstəlikləri olan insanlar daxildir.
Ekspertlər xəbərdarlıq edirlər ki, çirklənmiş havanın uzunmüddətli təsiri ürək-damar və tənəffüs yolları xəstəlikləri riskinin artmasına səbəb ola bilər.
