Festival iştirakçıları Ağdaşda konsert proqramı ilə çıxış ediblər.
Xəbər verdiyimiz kimi Ümummilli lider Heydər Əliyevin 100 illik yubileyi münasibətilə Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin birgə təşkilatçılığı ilə keçirilən Uşaq İncəsənət Festivalına (UİF) yekun vurulub.
Bununla əlaqədar olaraq Mərkəzi Aran Regional Mədəniyyət İdarəsinin təşkilatçılığı ilə festivalda iştirak edən uşaqların çıxışlarından ibarət konsert proqramı keçirilib.
Ağdaş rayon Heydər Əliyev mərkəzində baş tutan tədbirdə Regional İdarənin tabeliyində fəaliyyət göstərən uşaq musiqi və incəsənət məktəblərinin festivalda iştirak edərək fərqlənən uşaqları öz bacarıqlarını nümayiş etdiriblər. Festivalın müxtəlif nominasiyaları üzrə hər üç mərhələdə iştirak edən istedadlı uşaqların çıxışları alqışlarla qarşılanıb.
Tədbirdə Ağdaş Rayon İcra Hakimiyyətinin, Mərkəzi Aran Regional Mədəniyyət İdarəsinin, digər dövlət orqanlarının məsul işçiləri, idarə, müəssisə və təşkilatların, mədəniyyət müəssisələrinin əməkdaşları iştirak ediblər.
Xatırladaq ki, festivalın yekununda Ağdaş şəhəri “Əl sənətkarlığı şəhəri” nominasiyası üzrə fərqlənmiş və “Diplom”la təltif edilmişdir. Tədbirin sonunda “Əl sənətkarlığı şəhəri” nominasiyası üzrə qazanılan “Diplom” İcra Hakimiyyətinin rəhbərliyinə təqdim olunub.
Ağdaş Rayon İcra Hakimiyyəti başçısının müavini-İctimai-siyasi və humanitar məsələlər şöbəsinin müdiri Aynur Novruzova diploma görə Mədəniyyət Nazirliyi, Elm və Təhsil Nazirliyi və Heydər Əliyev Mərkəzinin rəhbərliyinə minnətdarlığını bildirib. Yekunda festival iştirakçılarının qaliblərinə fəxri fərmanlar və hədiyyələr təqdim edilib.
