- - - - -
Dekabrın 6-da Yevlax rayonu Xaldan kənd kompleks tam orta məktəbin şagird və müəllimləri ilə görüş keçirilib.
Görüşün əsas məqsədi Təhsilin İnkişafı Fondu ilə “Inci Group of Companies” şirkətinin birgə həyata keçirdiyi “Məktəblərə kitab ianəsi” layihəsi çərçivəsində Mərkəzi Aran Regional Təhsil İdarəsinə 800 kitabın təhvil verilməsi olub.
Görüşdə Təhsilin İnkişafı Fondunun İdarə Heyətinin sədri Elnur Nəsibov, Mərkəzi Aran Regional Təhsil İdarəsinin müdiri Elçin Kərimov, “Inci Group of Companies” şirkətinin bölgə müdiri Babək Həsənov, Yevlax rayonu üzrə təhsil sektorunun müdiri Namidə Abbasova, məktəbin müəllim və şagirdləri iştirak ediblər.
Təhsil idarəsinin müdiri Elçin Kərimov qonaqları salamlayaraq Fond və “İnci” şirkətinə həyata keçirilən layihəyə görə təşəkkürünü bildirib. Elçin Kərimov kitabların növbəli şəkildə digər məktəblərə veriləcəyini qeyd edib.
TİF-in İdarə Heyətinin sədri Elnur Nəsibov görüş iştirakçılarına Fondun tarixi, fəaliyyət istiqamətləri, hazırda icra edilən layihələr, qurduqları əməkdaşlıqlar haqqında məlumat verib. Sədr layihə haqqında ideyanın yarandığı ilk günlərdən “Inci Group of Companies” şirkətinin tam dəstəyini vurğulayıb. Elnur Nəsibov layihə çərçivəsində ümumi ianə ediləcək kitabların sayının 4000 ədəd olduğunu, eləcə də növbəti həftələr ərzində daha 2 Regional Təhsil İdarəsində görüşlərin keçirilməsinin nəzərdə tutulduğunu bildirib.
“Inci Group of Companies” şirkətinin bölgə müdiri Babək Həsənov “İnci” şirkətinin gələcəkdə məktəbin şagirdləri, əlaçıları üçün həvəsləndirici hədiyyələr təqdim edə və kitablar ianə edə biləcəyini vurğulayıb.
Görüş müəllim və şagirdlərin iştirak etdiyi müzakirələrlə davam edib.
