Səfər çərçivəsində qonaqlar əvvəlcə 44 günlük Vətən müharibəsi dövründə Ermənistan tərəfindən Gəncənin raket atəşinə tutulması nəticəsində Ə.Rəfibəyli küçəsi, “Qələbə” parkının yaxınlığında dağılan ərazini ziyarət ediblər. Onlar erməni terrorunda həyatını itirən dinc sakinlərin xatirəsinə ehtiram əlaməti olaraq dağılan yerlərin ətrafına gül düzüblər.
Türkiyənin Gəncədəki Konsulluğuna baş çəkən TARSİM-in nümayəndə heyəti Baş Konsul Rəcəp Öztop ilə görüşüblər.
Sonra qonaqlar Azərbaycan Dövlət Aqrar Universitetində (ADAU) Aqrar Sığorta Fondu ilə birgə keçirilən “Türkiyə və Azərbaycan aqrar sığorta sistemlərinin təqdimatı” mövzusunda tədbirdə iştirak ediblər.
Tədbirdə çıxış edən ADAU-nun rektoru Zəfər Qurbanov qonaqları salamlayaraq aqrar sektorun müasir tələbatına uyğun yerli kadrların yetişdirilməsi və Aqrar Universitetin bu sahədəki yeniliklərindən bəhs edib.
Aqrar Sığorta Fondunun İdarə heyətinin sədri Fuad Sadıqov ASF-nin fəaliyyəti, indiyədək əldə edilən nəticələr və aqrar sığortanın kənd təsərrüfatının inkişafındakı rolundan danışıb.
Türkiyə Cümhuriyyəti Kənd Təsərrüfatı Sığortası Hovuzunun Müşahidə Şurasının sədri Osman Yıldız çıxış edərək Türkiyədə aqrar sektor üçün risklərin idarə olunması, bu sahədə TARSİM-in fəaliyyəti və aqrar sığorta mexanizminin tətbiqinin Türkiyənin kənd təsərrüfatının inkişafına təsiri barədə məlumat verib.
Həmçinin, TARSİM-in baş direktoru Bekir Engürlü, ADAU-nun Maliyyə və iqtisadi nəzəriyyə kafedrasının müdiri Məhərrəm Hüseynov və Aqrar Sığorta Fondunun İctimaiyyətlə əlaqələr şöbəsinin rəhbəri Əli Əhmədov çıxışlar edərək Türkiyə və Azərbaycan arasında təcrübə mübadiləsi və aqrar sığortada Azərbaycan təcrübəsinin başqa ölkələrdə tətbiqi, aqrar kadrların səmərəli bacarıqlarının reallaşdırılması və digər mövzularda çıxışlar ediblər.
