Cəmiyyətdə elə insanlar var ki, vaxtında öz layiqli yerini, vəzifəsini tutsa cəmiyyət lap çox qazanar. Bu düşüncəmin konkret ünvan var - neçə-neçə illərdir intellekt işığımızı sönməyə qoymayan ORXAN FİKRƏTOĞLU.
1983-1991-ci illərdə Moskvada Dünya Ədəbiyyatı İnstitutunda təhsil alan, 1983-cü ildə kinomuza işıq tutan (işıqçı), müxtəlif dövrlərdə C.Cabbarlı adına "Azərbaycanfilm" kinostudiyasının, Dövlət Kino Komitəsinin, AzərTelefilmin baş redaktoru, "MİR" Teleşirkətinin direktor müavini, "Mozalan" satirik kinojurnalının direktoru, ANS şirkətinin baş icmalçısı vəzifələrində işləyən, 14 bədii, 3 publisistik kitabın müəllifi Orxan Fikrətoğlu bu yaxınlarda Mədəniyyət nazirinin müşaviri vəzifəsinə təyin edilib. Çox sevindirici haldır, uğurlu və layiqli təyinatdır. Yəqin ki, onun intellektini, zəkasının dərinliyini bilməyən yoxdur. Həmişə sözünün dəyərini bilən insanın bu vəzifəni daşımasına sevinməyən tapılmaz. İnanırıq ki, mədəniyyətimiz, incəsənətimiz daha böyük uğurlar əldə edəcə Belə vacib fəaliyyət sahəsində canını qoyanlara, işinin sözün həqiqi mənasında ustalarına dəyər verilməyi çoxumuzun ürəyindən xəbər verdi.
İlk hekayəsi "Kirpi" jurnalında çap olunanda Orxan Fikrətoğlunun 15 yaşı vardı. 17 yaşında kinopavilyonlarda kino çəkilişlərində iştirak edib. Onun hekayələri Oksvord Universitetinin dərsliklərinə salınıb. Ssenarilərinə 10-larla film çəkilib. Məşhur "Bəxt üzüyü" filminin həmssenaristlərindən biridir. "Tas", "Qıyığın ölümü", "Şəkilçi və şəkilçi" pyesləri ölkə teatrlarının səhnələrində oynanılıb.
Əməkdar incəsənət xadimidir. 57 yaşlı yaradıcı insanın hələ çox yaradıcı işlərindən danışmaq olar. Əsas məsələ odur ki, ədalət zəfər çaldı. Mədəniyyətimizin dayaq sütunlarından birinə uğurlar arzulayırıq.
Vaqif Osmanov
