Alimlər dünyanın ən uzunömürlü insanının DNT-sini araşdırıb və uzunömürlülüyün sirlərindən birini üzə çıxarıb.
Maria Branyas Morera ABŞ-da anadan olub, İspaniyanın şimal-şərqində ötən il 117 yaşında dünyasını dəyişib. Branyas ömrünün təxminən 110 ilini İspaniyada yaşayıb. O, 2020-ci ildə COVID-ə yoluxaraq dünyada bu virusa qalib gələn ən yaşlı insan kimi diqqət çəkib. Alimlər müəyyən ediblər ki, onun bioloji yaşı real yaşından 23 il daha gənc olub.
O, gündə üç dəfə qatıq yeyirmiş. Alimlərin fikrincə, onun rasionunda probiotik qatığa xüsusi yer verməsi sağlam qocalmasında mühüm rol oynayıb.
Maria Branyasın pəhrizində qatıqla yanaşı lifli qidalar da olub. O, hər səhər səkkiz müxtəlif dənli bitkidən hazırlanan smuzi qəbul edib. Bu qidalar bağırsaqdakı faydalı bakteriyalar üçün qida rolunu oynayaraq onların çoxalmasına şərait yaradıb.
