Fransada “Telegram” platforması vasitəsilə təşkil edilən yeni terror təşkilatı yaradılıb. "Defense des Droits des Prisonniers Français” (Fransız Məhbusların Hüquqlarının Müdafiəsi)" adlı qrup maşınları yandırıb, həbsxanalara və mühafizəçilərin evlərinə hücum edib.
Bu barədə yerli media məlumat yayıb.
Bildirilib ki, sözügedən qrup hücumlarda yanan maşınlara və hücum etdikləri həbsxanaların divarlarına adını yazdırıb. Min üzvü olan qrup həbsxananın mühafizəçilərini tanıyan, evlərini tapıb onlara hücum edənlərə 10 min manata qədər pul mükafatı təklif edib.
“Telegram” qrupu bəzi mesajları zorakılıq çağırışları ehtiva etdiyi üçün silib. Lakin platformada hələ də mühafizəçiləri tapa bilənlərə mükafatlar təklif edən mesajlar paylaşılmağa davam edir.
"Biz terrorçu deyilik. Həbsxanalarda insan hüquqlarını müdafiə etmək üçün buradayıq", - deyə qrupun yaydığı bəyanatda bildirilib.
Fransanın Terrorla Mübarizə Prokurorluğu istintaqı öz üzərinə götürüb. Daxili Kəşfiyyat Xidməti DGSI də prosesə cəlb edilib. Fransa hökuməti hücumların arxasında kimin dayandığını hələlik açıqlamayıb.
