Ermənistanın keçmiş prezidentləri Robert Köçəryan və Serj Sarkisyan baş nazir Nikol Paşinyanla Dağlıq Qarabağ üzrə danışıqlar prosesi ilə bağlı debata çıxmaqdan imtina ediblər.
Debata səbəb Nikol Paşinyanın sosial şəbəkələrdə dərc olunan bəyanatı olub. Həmin yazıda o, 1994-cü ildə atəşkəs sazişinin imzalanmasından bəri danışıqların sırf Dağlıq Qarabağın Azərbaycana qaytarılması ilə bağlı aparıldığını iddia edib. Baş nazirin sözlərinə görə, “danışıqlar prosesinin başqa məzmunu yox idi” və alternativ şərhlərdən yalnız daxili siyasi məqsədlər üçün istifadə edilib.
Bu bəyanat Paşinyanı yalan danışmaqda ittiham edən ikinci və üçüncü prezidentlərin ofislərinin nümayəndələrinin tənqidinə səbəb olub. Buna cavab olaraq baş nazir ölkənin keçmiş liderlərini “nümayəndələrinin arxasında gizlənməkdə” ittiham edərək, onları birbaşa debatlara çağırıb. Lakin onun dəvəti rədd edilib.
