Bakıda fəaliyyət göstərən təhsil ocaqlarından birində hicabla bağlı qadağanın olduğu bildirilir.
Suraxanı Rayonu Ramin Abiyev adına 85 saylı orta məktəbdə sözügedən qadağanın tətbiq edildiyi söylənilir.
Məlumata görə, təhsil müəssisəsinin direktoru Maxsud Əhmədov qız uşaqlarının məktəbə baş örtüyü ilə gəlməsinə icazə vermir.
İnanclı valideynlər bununla bağlı müvafiq qaydada müraciət etdiklərini bildirirlər. Lakin direktor müraciətlərə məhəl qoymadığından dəyişiklik olmayıb.
Təhsil Nazirliyinin mətbuat xidmətidən dəfələrlə oxşar məsələylə əlaqədar eyni reaksiya verilib.
“Bununla bağlı məktəblərin daxili nizamnaməsi var. Azərbaycan Respublikası Nazirlər Kabinetinin 2011-ci il 13 yanvar tarixli 5 nömrəli qərarı ilə təsdiq edilmiş ”Ümumtəhsil məktəbinin Nümunəvi Nizamnaməsi”nə əsasən, ümumtəhsil məktəblərində təhsil alanların geyim forması hər bir məktəbin öz nizamnaməsi ilə müəyyən olunur. Buna uyğun olaraq həmin prosesə nəzarət də məktəbin özü tərəfindən həyata keçirilir. Yəni məktəblilərin geyimi həmin daxili nizamnamə ilə müəyyən olunur. Geyim tədrisin aparılmasına maneçilik törədə bilməz” – rəsmi açıqlamada bildirilir.
Minval.info 85 nömrəli orta məktəbdən münasibət almağa çalışsaq da telefon zənginə cavab verən direktor müavini Maxsud Əhmədovun iş başında olmadığını söylədi. Ondan mövzuyla əlaqədar açıqlama ala bilmədik. Eyni zamanda məktəb rəhbərinin mobil telefonunun nömrəsini əldə etmək mümkün olmadı.
