Məktəb psixoloqlarına keçirilən təlim başa çatıb
- - - - -
Aprelin 5-də Mərkəzi Aran Regional Təhsil İdarəsinin tabeliyində fəaliyyət göstərən ümumi təhsil müəssisələrində çalışan psixoloqlar üçün "müəllim-şagird münasibətlərinin tənzimlənməsində psixoloqun rolu" mövzusuna həsr olunan təlim yekunlaşıb.
Mərkəzi Aran Regional Təhsil İdarəsinin inzibati binasında keçirilən təlimdə 29 nəfər məktəb psixoloqu iştirak edib.
Bakı Şəhəri üzrə Təhsil İdarəsinin Təlimə Dəstək Mərkəzinin psixoloji xidmətin təşkili bölməsinin rəhbəri Səidə Əhmədova təlim zamanı bir qrup məktəb psixoloquna ümumi təhsil müəssisələrində psixoloq xidmət işin təşkili, ailə-təhsil müəssisəsi münasibətlərinin düzgün tənzimlənməsi, təhsil müəssisəsində təhlükəsiz və sağlam mühitin yaradılması və digər zəruri məsələləri diqqətə çatdırıb. O həmçinin, müəllim-şagird münasibətlərinin mərkəzində müəllimin dayandığını, bu münasibətlərin şagird şəxsiyyətinin formalaşmasına xidmət etdiyini və məktəb psixoloqunun bu münasibətlərin düzgün tənzimlənməsində müsbət psixoloji iqlim yaratmalı olduğunu vurğulayıb.
Qeyd edək ki, 2 gün davam edən təlimin keçirilməsində məqsəd ümumi təhsil müəssisələrində dəstəkləyici və emosional-psixoloji mühitin təmin edilməsi baxımından psixoloji işin təşkili üzrə məktəb psixoloqlarının bilik və bacarıqlarının artırılmasıdır.
