Alman-Azərbaycan Xarici Ticarət Palatası tərəfindən təşkil olunan “Yeni çağırışlar fonunda Azərbaycanda miqrasiya idarəçiliyi” mövzusunda tədbir keçirilib.
“AHK-İmpuls” tədbirində Dövlət Miqrasiya Xidmətinin rəisi, II dərəcəli dövlət miqrasiya xidməti müşaviri Vüsal Hüseynov, AHK Azərbaycan rəhbərliyi və təşkilata üzv şirkətlər, diplomatik nümayəndəliklər və beynəlxlaq təşkilatların təmsilçiləri iştirak ediblər.
AHK Azərbaycanın fəaliyyətini yüksək qiymətləndirən Dövlət Miqrasiya Xidmətinin rəisi Vüsal Hüseynov bu görüşlərin əhəmiyyətini diqqətə çatdıraraq təşkilatçılara təşəkkürünü bildirib. Xidmət rəisi, Dövlət Miqrasiya Xidmətinin hər zaman sahibkarlarla dialoqun inkişafına xüsusi diqqət ayırdığını, innovativ metodların tətbiqini daim gündəmdə saxladığını söyləyib. Xüsusilə pandemiya dövründə sahibkarlara göstərilən xidmətlərin sadələşdirilməsi, yeni elektron xidmətlərin yaradılması, müxtəlif güzəştlərin tətbiqi, ölkə daxilində miqrantların yaşamalarının leqallaşdırılması və qanuni miqrasiyanın təbliği istiqamətində bir sıra mühüm işlərin reallaşdırıldığını bildirib.
Vüsal Hüseynov Prezident, Ali Baş Komandan cənab İlham Əliyevin rəhbərliyi ilə Azərbaycan torpaqlarının işğaldan azad olunması nəticəsində bu ərazilərdə aparılan genişmiqyaslı yenidənqurma və bərpa işləri ilə əlaqədar olaraq xaricdən cəlb edilən əcnəbi işçi qüvvəsinə artan tələbatın nəzərə alındığını və müvafiq olaraq kvotaların artırıldığını diqqətə çatdırıb. Bildirib ki, bütün istiqamətlər üzrə proqnoz məlumatlar ciddi araşdırılaraq preventiv tədbirlər həyata keçirilir.
Xidmətin sosial layihələri barədə söhbət açan Vüsal Hüseynov yaxın gələcəkdə DMX yanında Miqrant Şurasının yaradılacağını, Şuranın ölkəmizdə olan miqrantların həyat şəraitinin yaxşılaşdırılmasına töhfə verəcəyinə ümidvar olduğunu bildirib.
Sonra Xidmət rəisi iş adamlarını maraqlandıran məsələlər ətrafında fikir mübadiləsi aparıb, sualları cavablandırıb.
