Lüksemburq şəhərindəki “Qarabağ” Azərbaycan-Lüksemburq Mədəniyyət Assosiasiyasının binasında rəssam Rövşən Nurun “Sevgi rəmzi” adlı fərdi sərgisinin açılış mərasimi keçirilib.
31 dekabr – Dünya Azərbaycanlılarının Həmrəylik Günü münasibətilə təşkil edilən sərgi “Qarabağ” Azərbaycan-Lüksemburq Mədəniyyət Assosiasiyasının təşkilatçılığı ilə baş tutub. Mərasimdə Azərbaycanın, Türkiyənin, Estoniyanın Luksemburqdakı diplomatik korpusunun və yerli ictimaiyyətin nümayəndələri iştirak ediblər.
“Qarabağ” Azərbaycan-Lüksemburq Mədəniyyət Assosiasiyasının direktor müavini Arzu Həsənova, Türkiyənin Lüksemburqdakı səfiri Fazilet Dağçı Çığlik və başqaları çıxış edərək, rəssamın yaradıcılığından, bənzərsüz üslübundan danışıblar. Qeyd edilib ki, Azərbaycan mədəniyyətini əks etdirən əsərlər tamaşaçılarda müsbət duyğular doğurur, süjet və interpretasiyası ilə diqqəti cəlb edir. Rəssam düşüncə və texnikasını əks etdirən rənglər və elementlər vasitəsilə sənətsevərlərə öz ismarıcını çatdırır.
“Sevgi rəmzi” sərgisi 2022-ci il yanvarın 30-dək davam edəcək.
Qeyd edək ki, Rövşən Nur (Quliyev) Bakıda anadan olub. Azərbaycan Dövlət Rəssamlıq Akademiyasını və Tallin Rəssamlıq Akademiyasını bitirib. Azərbaycan Rəssamlar İttifaqının üzvüdür.
