Azərbaycan İlahiyyat İnstitutunda (Aİİ) Tələbə Elmi Cəmiyyətinin təşkilatçılığı ilə Elm Gününə həsr olunmuş onlayn tədbir keçirilib.
Yığıncağı giriş nitqi ilə açan Aİİ Tələbə Elmi Cəmiyyətinin sədri, Dillər və ictimai fənlər kafedrasının dosenti Məmmədəli Babaşlı vebinarın Hacı Zeynalabdin Tağıyevin xeyriyyəçilik və maarifçilik fəaliyyətinə həsr olunduğunu bildirib.
XIX əsrin sonu – XX əsrin əvvəllərində mövcud sosial, iqtisadi həyatdan bəhs edən M.Babaşlı H.Z.Tağıyev kimi din xadimlərimizin və ziyalılarımızın birlikdə fəaliyyətindən danışıb. Bu dövrün özünü dərketmə, milli oyanış baxımından Azərbaycan tarixində parlaq bir səhifəni özündə əks etdirdiyini vurğulayıb.
Daha sonra Milli Azərbaycan Tarixi Muzeyinin elmi katibi, tarix üzrə fəlsəfə doktoru Fərhad Cabbarov Hacı Zeynalabdin Tağıyevin həyatı və fəaliyyəti haqqında geniş məlumat verib. Qeyd edib ki, ölümündən 100 ilə yaxın müddət keçməsinə baxmayaraq, H.Z.Tağıyev xalqımız tərəfindən daim xatırlanır, həyatı və fəaliyyəti haqqında mütəmadi olaraq araşdırmalar aparılır.
F.Cabbarov vurğulayıb ki, H.Z.Tağıyevin təhsili olmasa da, o, elmə və maarifə daha çox önəm verirdi.
Mesenatın xeyriyyəçilik fəaliyyətinə stimul verən səbəbləri sadalayan məruzəçi H.Z.Tağıyevin həddən artıq inanclı olduğunu və sosial məsuliyyəti dərk etdiyini başlıca səbəb kimi qeyd edib. O, həmçinin Şərqdə ilk dünyəvi Qız Məktəbinin açılmasından, “Həyat” qəzetinin çap olunmasından da söhbət açıb.
F.Cabbarov bu gün də xeyriyyəçilik ənənələrinin davam etdiyini vurğulayıb. Bildirib ki, buna ən böyük nümunə 44 günlük Vətən Müharibəsində sosial vəziyyətindən asılı olmayaraq, hər kəsin cəbhəyə yardım etməsi idi.
Vebinar mövzu ətrafında müzakirələrlə davam edib.
