ADPU-nun Quba Filialında ulu öndər Heydər Əliyevin anadan olmasının 97-ci ildönümü ilə əlaqədar olaraq onlayn "Ustad dərsləri" adlı yeni layihəyə start verilib.
Direktor dosent Yusif Alıyevin təşəbbüsü ilə "Ustad dərsləri" layihəsi çərçivəsində mayın 9-da Millət vəkili, Milli Məclisin Ekologiya və təbii ehtiyatlar Komitəsinin sədri Sadiq Qurbanovla filialın tələbə və əməkdaşlarının görüşü keçirilib.
Onlayn görüş iştirakçılarını salamlayan filialın direktoru dosent Yusif Alıyev millət vəkili Sadiq Qurbanova təklifi qəbul etdiyinə görə təşəkkür edərək ona son zamanlarda filialda görülən işlər haqqında və "Ustad dərsləri" layihəsi haqqında məlumat verdi. O qeyd etdi ki, gənc nəslin təlim-tərbiyəsində, sağlam ideyalar əsasında formalaşmasında Heydər Əliyev irsinin öyrənilməsinə, təhlil edilməsinə böyük ehtiyac var. Bunun üçün də filial rəhbərliyi onlayn "Ustad dərsləri" layihəsinə start verərək ölkənin tanınmış ictimai-siyasi xadimləri ilə filialın tələbə və gənc əməkdaşlarının silsilə görüşlərini təşkil etməyi planlaşdırmışdır.
Onlayn görüşdən məmnunluğunu ifadə edən millət vəkili Sadiq Qurbanov "Ulu öndər Heydər Əliyev şəxsiyyətində Vətənə sədaqət prinsipləri" adlı nümunəvi mühazirə deyib. O, dinləyicilərə ümummilli liderin həyat və fəaliyyəti, azərbaycançılıq ideologiyası, qadın, gənclər siyasəti, Heydər Əliyev ideya nəzəri irsinin bu gün cənab Prezident İlham Əliyev tərəfindən davam etdirilməsi və bu kimi müxtəlif mövzularda ətraflı məlumatlar verərək ulu öndərin Vətənə sədaqət prinsiplərinin dərinliyini açıqlayıb.
Sonda tələbə-gənclərin Ulu öndərlə bağlı çoxsaylı suallarını maraqlı arqumentlərlə cavablandıran millət vəkili bu cür görüşlərin mütəmadi keçirilməsinin gənclər üçün önəmini qeyd edərək, görüşə görə filial rəhbərliyinə və təşkilatçılara təşəkkür və minnətdalığını bildirdi.
