Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin, Ədliyyə Nazirliyinin nəzdində Bakı Şəhər Probasiya Xidmətinin dəstəyi və "Ümidli Gələcək” Sosial Təşəbbüslər İctimai Birliyinin təşəbbüsü ilə “Uşaq Hüquqları Aylığı” çərçivəsində maarifləndirmə tədbiri keçirilib.
Tədbirdə probasiya xidmətində qeydiyyatda olan, azadlığın məhdudlaşdırılması növündə cəzaya məhkum edilən elektron qolbağlı və sosial-psixoloji reabilitasiya fəaliyyətinə cəlb olunan uşaq və yeniyetmələr, eləcə də onların valideynləri iştirak edib. Onlara uşaq hüquqlarının müdafiəsi, uşaq, yeniyetmə və gənclərin inkişafının təmin edilməsi və peşə hazırlığının təşkili və əmək bazarına inteqrasiya barədə məlumatlar verilib.
Qeyd olunub ki, bu gün Dövlət Məşğulluq Agentliyi tərəfindən həm Agentliyin Peşə Hazırlığı Mərkəzlərində, həm də özəl tədris müəssisələrində əmək bazarının əsas istiqamətləri üzrə hazırlıq kursları təşkil olunur. Xüsusilə həssas qrupdan olan şəxslər peşə kurslarına cəlb olunaraq onların məşğulluğuna dəstək göstərilir.
Görüşdə, həmçinin sosial cəhətdən həssas qruplardan olan uşaq, yeniyetmə və gənclərin cəmiyyətə reinteqrasiyası ilə bağlı görülən işlər və imkanlardan danışılıb.
